Qazaqstannyń eńbek sińirgen mádenıet qyzmetkeri, memleket jáne qoǵam qaıratkeri  Láılá Ǵalıqyzy dúnıeden ozdy, dep habarlaıdy Qamshy.kz aqparat agenttigi Mádnıet jáne sport mınıstrligi baspasóz qyzmetine silteme jasap.

Ol eńbek jolyn aktrısalyqtan bastap, senarıst, televıdenıe rejıseri, Qaz SSR kınematografıa jónindegi Memlekettik komıtettiń tóraıymy, Mádenıet mınıstriniń orynbasary, (1977-1981) Mınıstr laýazymdaryn abyroımen atqardy.

Láılá Ǵalıqyzy Ǵalymjanovany aqtyq saparǵa shyǵaryp salý sharasy Almatydaǵy Jambyl atyndaǵy fılarmonıada dúısenbi kúni saǵat 10:00-da ótedi.  

Láılá Ǵalıqyzy Ǵalymjanova - Qazaqstan aktrısasy, senarıshi, televıdenıe rejıseri.

1924 jyly Petropavl mańynda týǵan, Qazaqstannyń eńbek sińirgen mádenıet qyzmetkeri, memleket jáne qoǵam qaıratkeri.

Ákesi repressıaǵa ushyrap, anasy syrqattan erte qaıtys boldy. Láılá Ǵalıqyzy týystarynyń úıinde tárbıelengen.

Máskeýde BMKI-de (Búkilodaqtyq memlekettik kınematografıa ınstıtýty) bilim alǵan. Oqý bitirgen soń Almatyda Jas kórermender teatryna qabyldanady. Alaıda teatrda kóp turaqtaı alǵan joq. Ol Ádebıet jáne óner ınstıtýtyna aspırantýraǵa oqýǵa túsip, Muhtar Áýezovten tálim alady. Alaıda bul oqý ornynan da túrli sebeptermen shyǵyp qalady.

Kınodaǵy debúti "Altyn múıiz" fılminen bastalady. Osy fılmge túsip júrgen kezinde leıtenant-artıllerıst Zıa Abdollauly Qaraýlovqa kúıeýge shyǵady. Ekeýi uzaq jyldar boıy – 2001 jylǵa deıin baqytty otbasy súrip keldi. Bir ul, bir qyz ósirdi.

Alǵashqy rólden keıin aktrısany kınostýdıanyń senarlyq bólimine redaktor etip shaqyrady. Qyzmet at­qara júrip jazǵan «Joǵary dárejeli qyzmet» degen senarıi jabyq baıqaýǵa túsip, ekinshi júldeni jeńip alady. Kollektıvtegi qarym-qatynastarda keleńsiz jaǵdaılar (ıntrıga) bolmasyn dep avtor óz týyndysyn «Tájikfılm» kınostýdıasyna qoıýǵa beredi. Qaıta osydan keıin bul sheshimdi satqyndyq dep eseptegender de tabylyp, ári qaraı jumys isteýge múmkin bolmaı qalady. Senarı jaza alatyndyǵyna sengen Láıla Ǵalıqyzy taǵy senarı jazýǵa otyrady. «Shettegi kesh» atty sena­rıı jazyp bitiredi. Bir top áńgimeler jazyp M.O. Áýezovke usy­nady, oqyp shyqqan ustaz: «Seniń qolyń jeńil. Sóz­der­di durys qoldanasyń, olardyń naqty oryndaryn taba bilesiń. Keıipkerleriń senim týǵyzady, olar unamdy. Jaz!», – deıdi…

Láıla Ǵalymjanovany ómir qyzmet satylarymen arbap ákete beredi. Jańa bas kóterip kele jatqan Qazaq televızıasynyń alǵashqy bas rejıseri qyzmetine taǵaıyndalady, keıin Mádenıet mınıstriniń orynbasary, Mınıstri. Qazaq SSR-i Mınıstrler Keńesiniń mádenıet bóli­miniń meńgerýshisi (1959-1977), Kınematografıa jónindegi Memlekettik komıtettiń tóraıymy (1977-1981) boldy.